NAGDUDA ang barangay konsehal sa San Roque nga may kalambigitan sa kasong pagpatay sa iyang anak ang pag-ambush kaniya niadtong Martes sa gabii.
Si San Roque, Cebu City barangay konsehal Bobby Morados nasamdan sa bukton sa pagpusil sa duha ka mga tawo nga nagmotorsiklo sa may dalan Imus, dakbayan sa Sugbo.
Si San Roque, Cebu City barangay konsehal Bobby Morados nasamdan sa bukton sa pagpusil sa duha ka mga tawo nga nagmotorsiklo sa may dalan Imus, dakbayan sa Sugbo.
Sakay si Morados sa iyang Pajero uban sa iyang asawa nga si Elma dihang gikalitan pagpusil sa duha ka mga tawo.
Ikaduha na kining pagsuway og patay kaniya.
Ang unang pag-ambush nahitabo niadtong Agusto ning tuiga, apan wa maigo ang konsehal dihang gipusil atubangan sa iyang tindahan.
Apan usa ka babaye nga nipalit sa iyang tindahan naigo ug naangol.
Si Morados nga nahinabi sa sibyaanang dyLA namahayag nga wa siyay laing nahuna-hunaan nga magtinguha sa pagpatay kaniya kon di kadtong nalambigit nga grupo sa pagpatay sa iyang anak nga si Laurance Morados niadtong 2007.
Iyang gitumbok ang fraternity sa nabilanggong si Aristotle Avis nga maoy nagtinguha sa pagpatay kaniya.
Matod ni PO2 Erwin Pequero sa Homicide Section nga nagdagan subay sa dalan Imus ang biktima sakay sa iyang Pajero uban sa iyang asawa nga si Elma.
Nagsunod kanila ang service vehicle sa Barangay San Roque sakay ang lima ka mga barangay tanod.
Apan samtang nagdagan, kalit lang nga nitupad sa kilid ni Morados ang motorsiklo, diin ang backrider mibunot og armas ug dayong pusil sa biktima makatulo ka higayon.
Gipatik sa mantalaang SuperBalita Cebu Oktubre 06, 2011.