CEBU, Philippines - Gihimakak sa assistant post master nga si Bob Macuto ang report nga giingong duna silay kalabutan sa mga nangawagtang nga gipadala diha sa post office.
Si Macuto mipasabot sa konseho sa siyudad kabahin sa reklamo ni Cherryl Abangan kinsa nawagtangan sa iyang mga items. “Daghan na’g agian (pasabot ang mails), moagi pa na og Manila. Inig abot na nila diri, wala na mi kalibutan kung naa na diay nangawala,” matud ni Macuto.
Matud niya nga ang tanang mails gikan sa abroad moagi pa kini sa ilang buhatan sa Manila una pa kini mapadala ngadto sa nagkalain-laing sub-offices.
Ang kadtong alang sa Talisay City mohapit pa usab kini diha sa ilang buhatan sa Mandaue gikan sa Manila una kini maabot sa Talisay.
Si Abangan kinsa residente sa barangay Cansojong, Talisay mipadala og suwat ngadto sa post master kabahin sa pagkawala sa relo ug uban pang mga items nga gipadala sa iyang higala nga si Masahito Wada gikan sa Japan.
Si Bise Mayor Alan Bucao nagkanayon nga ang maong kaso ni Abangan dili lang maoy unang hitabo tungod kay ang iyang mga paryente (Bucao) nakasinati usab og samang insidente.
Matud ni Bucao nga dunay mga packages nga gipadala sa iyang mga paryente gikan sa abroad nga wala nila madawat ug kung duna may moabot duna nay kuwang sa packages.
“Dili ra ni karon nahitabo kay bisag akong mga iyaan nangreklamo man gani sa ilang mga package nga ma wa. Ug maabot man gani, magkuwang na”, ni Bucao pa. Si Bucao misugyot hinuon kang Macuto nga kung wala diha ang gipadalhan idiretso nalang kini sa barangay hall ug dili sa mga silingan sa gipadad-an.
Di palang dugay, usa ka Customs inspector ug usa ka sakop sa Philippine Postal Corporation ang nasakpan sa closed-circuit television camera didto sa kaulohan nga miabli sa usa ka package ug mikuha sa pipila ka sulod niini. - (BANAT NEWS)