IPAUBOS sa neuro-psychiatric evaluation si PO3 Romeo Bolaño, ang sakop sa Consolacion Police Station, kinsa nani-on og armas, nanghulga og official sa dihang nagmaoy kini sa niaging Sabado sa dakbayan sa Naga.
Kini maoy gipahibalo ni Sr. Supt. Patrocinio Comendador, director sa kapulisan sa lalawigan sa Sugbu, nunot sa iyang pag-rilibo kang Bolaño gikan sa nadestinohan niini sa Consolacion.
Ibalhin si Bolaño sa headquarters sa Cebu Provincial Police Office (CCPO) ubos sa Provincial Public Safety Battalion Company.
Gipasabot niini nga iyang ipa-ubos si PO3 Bolaño sa neuro-psychiatric test aron masuta kon unsa gyuy problema niini sa iyang kaugalingon nga maoy nakaingon sa iyang pagkabadlungon.
Matod pa nga adunay behavioral problem ang maong pulis ug angayan lang tinuon kon physically o mentally fit pa ba siya pagka pulis.
Gibutyag ni Comendador nga usa sa mga basihan nga matangtang ang usa ka pulis sa serbisyo kon kini dili na physically and mentally fit.
Gawas sa kasong grave misconduct posibling dismissal of service sab ang atubangon isilot.
Nagpaabot siya sa imbestigasyon nga gihimo ni Supt. Henry Biñas, hepe sa Provincial Investigation and Detective Management Branch (PIDMB), alang na sa pagdusog rekomendasyon ngadto sa Police Regional Office (PRO-7) labot sa kasong atubangon niini.
Ilang gitinguha nga kon dili mahuman karong semanaha karong sunod semana makaduso na silag report sa PRO-7.
Human unya makapiyansa ang maong police ingon man maka-recover sa iyang mga injury nga naangkon sugdan gilayon nila ang neuro-psychiatric evaluation.
Ibutang sa kampo ang maong pulis sa ingon dali ra nilang ma-monitor ang mga lihok niini.
Kahinumduman nga niadtong Sabado, sa gabii gihulga ni Bolaño, si Chief Insp. Timmar Alam, ang hepe sa Naga Police, ingon man giti-onan pa gyud og armas lakip ang mga sakop niini.
Gipatik sa mantalaang SuperBalita Cebu Oktubre 07, 2011.