NITULO ang mga luha ug nagbakho ang amahan sa 7-anyos nga batang lalake dihang nakahibawo siya nga gipatay ug gilubong sa live-in partner sa iyang kanhi kapuyo ang kinamanghuran niyang anak.
Samtang mga opisyal sa Mandaue City Jail naneguro nga di magkatipon sila si Manuel Punzalan, amahan ni Gabriel Morales, ug si Mario Abecia, sa bilanggoan.
Si Punzalan nibutyag nga sakit alang kaniya ang nahitabo sa iyang kinamanghuran nga anak.
Ang mas sakit niini wa siyay nahimo pagpanalipod sa iyang anak tungod kay anaa man siya sud sa Mandaue City Jail.
Iyang gitug-an nga daan na siyang nipasidaan sa iyang asawa nga kon mangita mag laing lalake, siguruon nga kadtong mga lalake nga mopangga usab sa ilang mga anak aron di dagmalan ang tulo ka mga bata.
Gusto niya nga pabayron sa iyang krimen nga nahimo si Abecia nga miangkung maoy nipatay sa bata.
Matod sa amahan nga katapusang nakabisita kaniya ang iyang anak upat ka bulan na ang nilabay.
Suod niya ang bata tungod lagi maoy kinamanghuran.
Si Punzalan napriso sa miaging tuig tungod sa pagpayuhot og ginadiling drugas.
Nanawagan usab siya sa iyang mga kauban sa trabaho ug mga higala nga duawon siya ug tabangan sa iyang kaso aron iya nang maatiman ang iyang pamilya.
Samtang di syento porsiyento nga masiguro sa mga sakop sa Bureau of Jail Management and Penology (BJMP) sa Mandaue City ang kaluwasan ni Abecia sulod sa bilanggoan.
Giangkon ni Chief Insp. Jessie Calumpang, warden sa Mandaue City Jail, nga mamiligro gyud si Abecia kon mabalhin na sa ilang pasilidad ilabi na kay bata ang gipatay niini.
Hinuon daling giklaro sa opisyal nga aron malikayan nga magtagbo sila si Abecia ug Punzalan, ilang ibutang sa lain nga building ang suspek sanglit si Punzalan toa man gibutang sa annex building sa nahisgutang bilangguan.
Gipatik sa mantalaang SuperBalita Cebu Oktubre 06, 2011.