UPAT ang patay -- duha nabiktima sa pagpmusil -- usa gidunggab, samtang lain ang nabiktima sa hit-and-run atol sa piyesta nga gipahigayon sa mi-aging gabii sa lungsud sa Dumanjug, Cebu.
Si Cristo Ornadañeza, hingkod ang panuigon taga Barangay Minolos, Barili gidungab-patay mga ala 6:15 sa kagabhion niadtong Martes sa kahulugan sa piyesta didto sa peryahan sa Barangay Poblacion.
Si PO2 Rafael Baritua, desk officer sa Dumanjug Police, nga nahinabi sa Sun.Star Superbalita, nagkanayon nga nakainom ang biktima ug duna kini gikalalis dapit sa peryahan nga iyang gikasumbagay.
Matod pa nga ang wala mailhing suspetsado nga medyo gamay nga pagkatawo, nalupig kini ug sa wa damha kalit nga nibunot sa mahait nga hinagiban ug gidunggab ang biktima diha sa iyang dughan.
Gideklalar nga dead-on-arrival si Ornadañeza.
Pagka-alas 6:50 sa maong adlaw, usa ka Eleuterio Rojo, 63, minyo ug usa ka trisikad driver nga taga Li-ong, Dumanjog ang dead-on-arrival usab nga nahiabot sa tambalanan human kini nabiktima sa hit-and-run sa puti nga awto nga Sedan.
Giingon nga way plate number ang sakyanan nga nakaigo sa biktima samtang padulong na kini nga mopauli gikan namasahero sa pista.
Kagahapon usab sa alas 12:40 sa kadlawon, usa ka estambay ang gipusil-patay sa wala mailhing suspetsado gawas sa diskohan sa mao gihapon nga lungsod human kini makakitag away.
Si Baritua, miingon nga usa ka Habagat Rosales, 26, ulitawo taga Barangay Looc, Dumanjug, ang namatay diha-diha dayon human nakaangkon og samad pinusilan sa iyang walang ilok gikan sa bala sa kalibre .45.
Matod pa niini nga tungod kay naka-inom ang biktima uban sa iyang mga barkada dunay gikaaway didto sa sulod sa diskohan. Dihang nigawas kini mga 15-20 metros ang gilay-on atbang sa diskuhan kalit lang kini nga gipusil.
Upat ka mga kabhang sa bala sa kalibre .45 ang na-recover sa crime scene ug usa ka slug.
Pagka-alas 5:20 kagahapon sa kadlawon usa ka ambulant vendors nga natulog ang gipusil patay diha sa peryahan sa Barangay Poblacion sa maong lungsod.
Si Sandy Bandolon, minyo ug taga Soong dakbayan sa Lapu-Lapu samdan sa iyang ulo human gipusil sa wala mailhing suspetsado.
Si Sr. Supt. Patrocinio Comendador, direktor sa kapulisan sa lalawigan sa Sugbu, nagkanayon nga dunay mga security plan nga gipatuman ang mga chief of police nila sa probinsya.
Gawas niini duna silay gipangbutang nga mga sakop sa Regional Public Safety Battalion (RPSB)sa maong lugar ingon man sa ubang lugar sa probinsya nga mag-fiesta.
Apan tungod sa kadaghan sa tawo dili malikayan nga dunay krimen nga mahitabo, susama sa gihisgutan sa unahan.
Gipatik sa mantalaang SuperBalita Cebu Oktubre 06, 2011.